काठमाडौं- नेपाल प्रिमियर लिग क्रिकेट प्रतियोगिता अन्तर्गत शुक्रबार जारी दोस्रो खेलमा लुम्बिनीले पोखरा एभेन्जर्सलाई १७१ रनको चुनौती दिएको छ ।

लुम्बिनी लायन्सका लागि कप्तान रोहित पौडेलले विस्फोटक ब्याटिङसहित ९५ रन बनाए । उनी अन्तिम बलमा रनआउट हुँदा ५ रनले शतक बनाउन चुके ।

नेपाली राष्ट्रिय टोलीका कप्तानसमेत रहेका रोहितले ५९ बलमा ९५ रन जोड्दा१० चौका र ४ छक्का पनि हाने ।

लुम्निबीका दुवै ओपनर आशुतोष घिरिया र उन्मुक्त चन्द शून्यमै आउट भएपछि क्रिजमा आएका रोहितले राष्ट्रिय टीमकै शैलीमा लय समाते ।

आशुतोषको विकेट गुमेपछि रोहित मैदान छिरेका थिए । दुवै ओपनर आउट भएपछि दबाबमा परेको लुम्बिनीको स्कोर रोहितले उकासेर १७० सम्म पुर्‍याएका हुन् ।

कीर्तिपुर मैदानमा टस जितेर लुम्बिनीले पहिला ब्याटिङ राजेको थियो । यस्तो अवस्थामा रोहितलाई टोम मुरेसले बलियो साथ दिए । उनले ३८ बलमा ४५ रनको गतिलो योगदान दिए ।

त्यसपछि सन्दीप जोराले १५ बलमा १८ रन बनाउँदै टोलीलाई उकास्न सहयोग गरे । उता पोखराका लागि विपिन खत्रीले २ र म्याट क्रिटिचेल्लीले १ विकेट लिन सके ।

एनपीएलको जारी प्रतियोगितामा यो दशौं अर्धशतक हो । यसअघि चितवनका रवि बोपाराले दुई अर्धशतक र ब्रान्डन म्याकमुलेन, लोकेश बम, शिखर धवन, रवि बोपारा, दीपेन्द्र सिंह ऐरी, अनिल साह, लाहिरु मिलान्था र मार्टिन गप्टिलले अर्धशतक प्रहार गरेका थिए ।

कीर्तिपुर मैदानमा टस जितेर लुम्बिनीले पहिला ब्याटिङ राजेको थियो ।

तस्बिरहरू : चिरायु शाक्य