काठमाडौंं – सोमबार साँझ चलेको हावाहुरीका कारण त्रिभुवन अन्तर्राष्ट्रिय विमानस्थलबाट हुने आन्तरिक तथा अन्तर्राष्ट्रिय उडान प्रभावित भएको छ ।

साँझ ठुलो हावाहुरी चलेपछि काठमाडौंतर्फ आइरहेका सातवटा आन्तरिक उडान डाइभर्ट गरिएको विमानस्थलले जनाएको छ । त्यस्तै काठमाडौंबाट विराटनगर र भैरहवा जाने तीनवटा उडान रद्द गरिएको छ ।

भैरहवाबाट उडेका बुद्ध एयरका दुईवटा उडान, श्री एयरलाइन्सको सुर्खेत र धनगढीबाट आइरहेका जहाज डाइभर्ट गरिएको थियो ।

हावाहुरीका कारण काठमाडौं, ललितपुर र भक्तपुरका केही स्थानमा बिजुली पनि अवरुद्ध भएको थियो । मौसम पूर्वानुमान महाशाखाका अनुसार सोमबार राति देशका पहाडी भूभागमा मेघगर्जन र चट्याङसहित हल्कादेखि मध्यम वर्षाको सम्भावना छ ।

‘सोमबार राति देशका पहाडी भूभागमा आंशिकदेखि साधारणत बदली हुनेछ । बाँकी भूभागमा आंशिक बदलीदेखि मौसम मुख्यतस्सफा रहने छ’, महाशाखाले भनेको छ, ‘कोशी, बागमती, गण्डकी र कर्णाली प्रदेशका पहाडी भूभागका थोरै स्थानमा मेघगर्जन र चट्याङसहित हल्कादेखि मध्यम वर्षा हुने छ ।’

महाशाखाले देशका बाँकी भूभागका एक/दुई स्थानमा मेघगर्जन र चट्याङसहित हल्का वर्षाको सम्भावना रहेको जनाएको छ ।