चितवन- चितवनको इच्छाकामना गाउँपालिकाले पेय पदार्थहरू ‘कोल्ड ड्रिंक्स’लाई निषेध गर्ने निर्णय लिएको छ ।

इच्छाकामना गाउँपालिकाका अध्यक्ष दानबहादुर गुरुङले किसानलाई फाइदा दिने गरी ‘कोल्ड ड्रिंक्स’ निषेध गरेर दही-मही प्रवर्द्धन कार्यक्रम ल्याइएको बताएका छन् ।

‘सुरुदेखि नै गाउँपालिकामा हामीले यो निर्णय गरेका थियौँ । गर्मीमा अत्यधिक प्रयोग गरिने ‘कोल्ड ड्रिङ्कसभन्दा दही-मही प्रयोग गर्न प्रोत्साहन गर्दैछौँ’, उनले भने, ‘स्थानीय उत्पादनको प्रवर्द्धनका लागि काम गरेका हौँ । अब अरू सरकारी कार्यालयमा पनि सर्कुलर गर्दैछौँ ।’

चिकित्सकहरूले पनि इच्छाकामनाको यो निर्णयको स्वागत गरेका छन् । चिनीको मात्रा अत्यधिक हु्ने कोल्ड ड्रिङ्क्सभन्दा दही-मही उत्कृष्ट पेय भए पनि यसको गुणस्तरमा ध्यान दिनुपर्ने उनीहरूको भनाइ छ ।

चिकित्सकहरूले दही-मही र दूध बजारसम्म लैजाँदा सफाइ र प्याकेजिङमा ख्याल गर्न पनि सुझाएका छन् ।

गाउँपालिका अध्यक्ष गुरुङले सरसफाइ र प्याकेजिङको गुणस्तरमा विशेष ध्यान दिन अनुगमन गरिने बताए ।

इच्छाकामना गाउँपालिकाले जाडो मौसममा दूधचियाले पाहुनालाई स्वागत गर्ने भएको छ ।

गाउँपालिकाको पहिलो कार्यपालिका बैठकले पालिकाभित्र सबै किसिमका आयातित पेय पदार्थ निषेध गरिसकेको छ । उक्त निर्णयअनुसार गाउँपालिकाले कार्यक्रम हुँदा हरेक पटक १० लिटरसम्म दही-मही किन्ने गरेको छ ।