दोलखा- यस पटकको हिउँदमा पर्याप्त पानी नपर्दा दोलखाका किसानले लगाएको गहुँ बालीमा पहेँलो सिंदुरे रोगको प्रकोप देखिएको छ । पर्याप्त हिउँदे वर्षा नहुँदा किसानले लगाएको गहुँ बालीमा सिंदुरे रोगको प्रकोप फैलिएको पाइएको हो । मुख्यगरी जिल्लाको वैतेश्वर गाउँपालिकाको वडा नम्बर-१ को गोपी बेँसी, वडा नम्बर-३ को मजुवा दोभाने बेँसी, निम्कोट बेँसीमा धेरै मात्रा सिंदुरे प्रकोप देखिएको हो ।

यता वैतेश्वर गाउँपालिकाको कृषि शाखाले हालसम्म सिंदुरे प्रकोप भएका ठाउँका किसानले कृषि प्राविधिकलाई कुनै जानकारी नगराएको जनाएको छ । यता सम्पर्कमा आएका वडा नम्बर ३ का केही किसानलाई रोग नियन्त्रणको लागि प्राविधिक सल्लाह सहित विषादी समेत दिएर पठाएको वैतेश्वर गाउँपालिका कृषि प्राविधिक निरोज पाण्डेले बताए ।

प्राविधिक पाण्डेका अनुसार हालसम्म प्रकोपपीडित दुई जना किसान पालिकाको सम्पर्कमा आएका थिए र  उनीहरुलाई रोग नियन्त्रणको आवश्यक सल्लाह र केही विषादी समेत दिएर पठाइएको थियो । त्यसबाहेक हालसम्म कुनै किसानले रोगको बारेमा जानकारी नदिएको उनले बताए ।

-सुबास बस्नेत