काठमाडौं- झापा गोल्डकपको चार पटकको विजेता त्रिभुवन आर्मी क्लब छैटौं झापा गोल्डकपको सेमिफाइनलमा प्रवेश गरेको छ ।

विर्तामोडस्थीत डोमालाल राजवंशी रंगशालामा बुधबार भएको खेलमा मच्छिन्द्र फुटबल क्लबलाई २ –१ गोलको जित निकाल्दै आर्मी अन्तिम चारमा प्रवेश गरेको हो । आर्मीका लागी खेलको ६१ औं मिनेटमा नवयुग श्रेष्ठले पहिलो गोल गरे भने ८० औं मिनेटमा बसन्त जिम्बाले थप गोल गरि नजिता दोब्बर बनाए ।

सुरुमा अग्रता लिएको मच्छिन्द्र फुटबल क्लबका लागी खेलको ११ औं मिनेटमा हिसुब थपलियाको उत्कृष्ट पासमा स्टेफन्स विनोङ्सले गोल गरे । दुई पटकको ए डिभिजन लिग बिजेता मच्छिन्द्रले खेलको शुरुवातीमा आक्रमक खेलेपनि अग्रता जोगाउन नसक्दा पराजय व्यर्होनुपर्यो । पहिलो हाफमा दवावमा परेको आर्मिले दोस्रो हाफमा सम्हालिदैं उत्कृष्ट खेल प्रर्दशन गरेको थियो ।

छैटौं संस्करणको झापा गोल्डकप फागुन २८ गते सम्म सञ्चालन हुनेछ । बिहीबारको खेल आयोजक झापा– ११ र एन्फा मकवानपुर बिच अन्तिम क्वाटरफाईनल खेल हुने झापा गोल्डकप आयोजक समितिले जनाएको छ ।