काठमाडौं- भारतको गुरुग्राम क्षेत्रमा बस्ने एक जना नेपालीमाथि १४ वर्षीया नेपाली बालिकाको घाँटी रेटेर हत्या गरेको आरोप लागेको छ । व्यक्तिगत दुश्मनीको बदला लिनका लागि ती नेपालीले छिमेकीकी छोरीको घाँटी रेटेर हत्या गरेको र हत्यापश्चात शवलाई कम्बलमा बेरेर आफ्नै घरमा लुकाएको घटना बाहिर आएको हो ।

आज तकले जनाएअनुसार आइतबार राति करिब ९ बजे उक्त घटना भएको हो । सूचना पाउनासाथ प्रहरी घटनास्थलतर्फ गएको र शवलाई पोस्टमार्टमका लागि पठाइएको आज तकले जनाएको छ । प्रहरीका अनुसार आफ्नो परिवारसँग गुरुग्रामको इन्दिरा कोलोनीमा भाडामा बस्ने ती बालिकालाई आमाले बाथरुममा साबुन लिन पठाएकी थिइन् ।

साबुन लिन बाथरुम गएकी छोरी धेरैबेर सम्म नआएपछि परिवारले उनको खोजी थालेको थियो । पीडितका बाबु ज्ञानी थापाले आरोपीलाई आफ्नो कोठाबाहिर देखेपछि छोरीका बारेमा सोधखोज गरेका थिए । आरोपीले ती बालिका खाना किन्न बाहिर गएको प्रष्टोक्ति दिएका थिए ।

पछि शंका लागेपछि पीडितको परिवारले आरोपीलाई आफ्नो कोठाको ढोका खोल्न आग्रह गरेका थिए । आरोपीले ढोका खोल्न नमानेपछि जबरजस्ती ढोका खोल्न खोज्दा आरोपी घटनास्थलबाट फरार भएका थिए ।

ढोका खोलेर हेर्दा ती बालिकाको शव कम्बलमा बेरेर राखेको अवस्थामा फेला परेको थियो । घटनाबारे प्रहरीले अनुसन्धान सुरु गरेको छ । व्यक्तिगत दुश्मनीका कारण घटना भएको हुनसक्ने प्रहरीको प्रारम्भीक अनुमान छ ।

पीडितका पिताले आफ्नो घर नेपालमा रहेको र सन् २०१९ मा इन्दिरा कोलोनीमा बस्दै आएको बयान दिएका छन् । उनका अनुसार रामु भन्ने आरोपी पनि नेपाली नै हुन् । यद्यपि पीडित परिवार र हत्याका आरोपी नेपालको कुन ठाउँका हुन् भन्नेबारे स्पष्ट छैन ।