काठमाडौं । राष्ट्रिय प्रजातन्त्र पार्टी (राप्रपा)ले राष्ट्रिय सभा निर्वाचनको विषयमा सत्ता गठबन्धनसँग छलफल गर्ने भएको छ ।

शनिबार बसेको राप्रपाको केन्द्रीय कार्यसम्पादन समितिको बैठकमा राष्ट्रियसभा निर्वाचनमा मिलेर अगाडी बढ्नेबारे सत्ता गठबन्धनसँग छलफल गर्ने निर्णय भएको प्रवक्ता मोहन श्रेष्ठले जानकारी दिए ।

उनका अनुसार पार्टीका कार्यवाहक अध्यक्ष बुद्धिमान तामाङ्ले आइतबार गठबन्धनका नेतासँग छलफल गर्ने छन् । खबरहबसँग उनले भने, ‘कार्यबाहक अध्यक्षले एक पटक बसेर छलफल गर्ने हाम्रो निर्णय भएको छ ।’

स्रोतले दिएको जानकारी अनुसार गठबन्धनसँग सहमतिको प्रयास गर्ने, सहमति नभए आफ्नै उम्मेदवार खडा गर्ने राप्रपाको तयारी छ । तर राप्रपालाई समेट्न गठबन्धन तयार नरहेको बुझिएको छ ।

आगामी माघ ११ गते हुने राष्ट्रियसभा सदस्य निर्वाचनका लागि यही पुस २३ गते सोमबार उम्मेदवारी मनोनयनको समय तोकिएको छ ।

राष्ट्रियसभामा आगामी फागुन २१ गतेबाट अध्यक्षसहित २० सांसदको कार्यकाल सकिँदै छ । जसमा एकजना मन्त्रिपरिषदको सिफारिसमा राष्ट्रपतिले मनोनीत गर्नेछन् भने १९ जना मतदानबाट चुनिने छन् ।

यो पनि…

राष्ट्रियसभाको सिटमा मिलेन गठबन्धनको भागबन्डा