काठमाडौं– नेपाल प्रिमियर लिग (एनपीएल) अन्तर्गतको जारी खेलमा सुदूरपश्चिम रोयल्सका ब्याटर ब्रान्डन म्याकमुलेनले काठमाडौं गुर्खाजविरुद्ध अर्धशतक प्रहार गरेका छन् । उनले ३१ बलमा अर्धशतक पूरा गरेका हुन् ।

अर्धशतक प्रहारपछि ब्रान्डन मैदानमा लामो समय टिक्न सकेनन् । त्यसपछि उनले ५ बल मात्रै खेले । उनी ३६ बलमा ५३ रन बनाएर पवेलियन फर्किए ।

स्कटल्यान्डका अलराउन्डर ब्याटर समेत रहेका ब्रान्डनलाई काठमाडौं गेर्हार्ड इरास्मसले शाहब आलममार्फत क्याच आउट गराएका हुन् । जारी प्रतियोगितामा अर्धशतक प्रहार गर्ने ब्रान्डन आठौँ ब्याटर बनेका छन् ।

यसअघि लोकेश बम, शिखर धवन, रवि बोपारा, दीपेन्द्र सिंह ऐरी, अनिल साह, लाहिरु मिलान्था र मार्टिन गप्टिलले अर्धशतक प्रहार गरेका थिए ।

कीर्तिपुर मैदानमा टस जितेर काठमाडौं गुर्खाजले सुदूरपश्चिमलाई पहिला ब्याटिङको निम्तो दिएको हो ।