काठमाडौँ – दक्षिण कोरियाका निवर्तमान रक्षा मन्त्री किम योङ हानमाथि भ्रमण प्रतिबन्ध लागेको छ । बिहीबार बिहान मात्र राष्ट्रपति योलबाट राजीनामा स्वीकृत भएपछि पदमुक्त भएका उनलाई प्रहरीले प्रतिबन्ध लगाएको हो ।

किम भागेर अन्य स्थानमा जाने सम्भावनालाई दृष्टिगत गर्दै सो निर्णय गरिएको प्रहरी अधिकारीहरूले जनाएका छन् । मंगलबार राष्ट्रपतिले सैन्य शासनको घोषणा गर्नका आफू पनि जिम्मेवार रहेको स्वीकार गर्दै उनले माफी सहित राजीनामा दिएका हुन् ।

सैन्य शासन फिर्ता लिएका राष्ट्रपति युन सुक योल माथिको महाअभियोग पारित भएमा १० वर्षको अन्तरमा यसै गरी पदमुक्त हुने उनी दोस्रो राष्ट्रपति हुने छन् । यस अघि सन् २०१६ मा मार्क जयुन हायमाथि पनि महाअभियोग पारित भएको थियो ।

दक्षिण कोरियामा महाअभियोग पारित हुनका लागि संसद्को ३०० सदस्य मध्य २०० जनाको प्रस्तावमा समर्थन चाहिन्छ। तर त्यो नै पर्याप्त हुँदैन । त्यो निर्णय संवैधानिक अदालतबाट अनुमोदन हुन आवश्यक छ । यसका लागि संवैधानिक अदालतको ९ जनाको बेन्चको ६ जनाले संसद्ले पास गरेको महाअभियोग प्रस्तावलाई स्वीकार गर्न पर्ने छ ।

यसअघि सन् २०१६ मा हाय माथिको महाअभियोग संवैधानिक अदालतले पनि स्वीकार गरेको थियो । परन्तु सन् २००४ मा तत्कालीनमा रुन म्यो हुन विरुद्धको महा अभियोग संसद्ले पारित गरे पनि संवैधानिक अदालतले हुनलाई पुर्न स्थापित गरेको थियो ।