काठमाडौं– नेपाली कांग्रेसका नेता डा‍‍. मिनेन्द्र रिजालले समानुपातिक सूचीमा समावेश हुने व्यक्तिहरूको बारेमा पार्टीले उचित क्लस्टर तयार गर्नुपर्ने बताएका छन् । 

बिहीबार संविधान निगरानी समूहले आयोजना गरेको संयुक्त सरकारको अभ्यास, शासकीय प्रभाव विषयमा बोल्दै नेपाली कांग्रेसका पूर्व सांसद रिजालले समानुपातिकको सूचीमा अवसर पाएका खस आर्यलाई नै ठूला दलले समावेश गरेको स्पष्ट पारे । 

उनले भने, ‘मेरो जस्तो अनुहारलाई किन समानुपातिकमा ल्याउने अरूको उदाहरण नदिई मेरो दिएको हो । काठमाडौँमा घर भएका र  टन्न  सम्पत्ति भएका मान्छे समानुपातिकमा किन राख्ने यो विषयमा दलहरूले सोच्नुपर्छ । ’ 

उनले थ्रेसहोल्ड बढाएर सरकार स्थिर नहुने भन्दै थ्रेसहोल्ड बढाउँदा साना दलहरू मारमा पर्ने कुरालाई समेत ध्यान दिन आग्रह गरे । 

उनले भने, ‘स्थिर सरकार दिनलाई दलहरूले बहुमत ल्याउनुपर्छ । थ्रेसहोल्ड बढाएर मात्र समस्या समाधान हुँदैन जस्तो लाग्छ ।’ 

उनले अगाडि भने, ‘सरकार बदलिएपछि मात्र अर्थतन्त्र खतरामा पर्छ अरू बेला थाहा हुन्न । मैले मेरै पार्टीका मान्छेको पनि कुरा गरेको हो । पार्टी सभापतिले चलाउने कि प्रधानमन्त्रीले चलाउने हो यो पनि बहसको विषय हो । यसमा पछि बहस गरौला ।’