काठमाडौं– करिश्मा मानन्धर र प्रियंका कार्कीको शीर्ष भूमिका रहने फिल्म ‘माइली’को शुभमुहूर्त गरिएको छ । काठमाडौंको भद्रकाली मन्दिरमा सोमबार बिहान मुहूर्त गरिएको हो ।

नायिका प्रियंका कार्की र बाल कलाकार कमला घिमिरेले मुहूर्त सट दिए । फिल्ममा प्रियंका र कमला आमाछोरीको भूमिकामा छन् ।

यससँगै मंगलबारदेखि फिल्मको छायांकन सुरु हुने निर्माण पक्षले बताएको छ । निर्देशकबाबु साहेब बलामीका अनुसार फिल्म सत्य घटनामा आधारित कथामा महिलाको पीडा देखाइनेछ ।

कथाबारे बलामी भन्छन्, ‘दलित महिलाको श्रीमान् नभएपछि समाजले ऊमाथि कस्तो दृष्टि लगाउँछ ? उसका स–साना नाबालक छोरी हुर्काउन कति कठिन हुन्छ ? यही समाज जातीयताको आडमा कसरी प्रताडित गर्छ भन्ने कथा फिल्ममा देखाइनेछ ।’

निर्देशक बलामीका अनुसार फिल्म काठमाडौं, कुलेखानी, मकवानपुर र दुबईमा खिचिनेछ ।

यस फिल्ममा प्रियंका, करिश्मा, कमलासहित शर्मिला मल्ल, सुष्मा लामा, कुसुम शर्मा लगायतको अभिनय हुने छ ।

रुना इन्टरटेन्ट्मेन्टको ब्यानरमा बन्ने फिल्मका लेखक निर्देशक बलामी आफैँ हुन् भने पटकथा र संवाद राजेन्द्र बजगाईँको छ ।