काठमाडौं– साताको पहिलो नेपाल स्टक एक्सचेन्ज (नेप्से) ४०.७६ अंकले बढेको छ । नेप्से १.४७ प्रतिशतले बढेर २७९६.३८ विन्दुमा पुगेको छ । नेप्से करिब २८ सयको विन्दुमा पुगेसँगै कारोबारमा पनि उछाल आएको छ । 

आइतबार सार्वजनिक बिदा भएकाले बन्द रहेको नेप्से सोमबार साताको पहिलो बजार खुल्दा २१ अर्ब ८६ करोड ४९ लाख ९२ हजार रुपैयाँ बराबरको ४ करोड ९७ लाख ७३ हजार ७३० कित्ता शेयर २ लाख ३८ हजार ७८ पटक किनबेच भएको छ । 

आज वाणिज्य बैंकलगायत धेरै कम्पनीहरूले गत आर्थिक वर्षको वित्तीय विवरण सार्वजनिक भएसँगै शेयर बजारमा पनि रौनक आएको देखियो । कम्जोर र नाफा कम भएका कम्पनीमा भन्दा राम्रो वित्तीय अवस्था भएको कम्पनीमा लगानीकर्ताको आकर्षण बढी देखिएको थियो । 

नेप्सेले आज १ बजेर ४७ मिनेटमा भने २८ सयको विन्दु समेत पार गरेको थियो । तर २ बजे भने नेप्से २८ सय भन्दा तल झरेको थियो अन्त्यमा बजार बन्द हुँदा भने नेप्से २७९६ मा बन्द भएको थियो । सोमबार नेप्सेले ५५ अंकको एकै दिन करेक्सन भएको देखिएको छ । 

नेप्से ४० अंकले बढ्दा १३ वटा समूहमध्ये ७ वटा समूहको शेयर मूल्य मात्र बढेको छ । बाँकी ६ वटा समूहको शेयर मूल्य भने घटेको छ । प्रतिशतका आधारमा सोमबार सबैभन्दा बढी होटल एण्ड टुरिजमको ६.६९ प्रतिशतले शेयर मूल्य बढेर ७७८०.६६ विन्दुमा पुगेको छ । सबैभन्दा कम बढ्नेमा निर्जीवन बीमा १.२५ प्रतिशतले बढेर १३ हजार ६७१.६४ विन्दुमा पुगेको छ । 

आज सबैभन्दा बढी घट्नेमा फाइनान्स ४.६१ प्रतिशतले घटेर ३४०४.१३ विन्दुमा पुगेको छ । प्रतिशतकै आधारमा कम मूल्य घट्ने समूह म्युचलअ फण्ड रहेको छ । उक्त समूह ०..१८ प्रतिशतले घटेर २१.८२ विन्दुमा पुगेको छ । 

म्युचअल फण्ड, कम्पनी र बोन्ड गरेर ३२६ वटा स्टक कारोबार हुँदा १६३ वटा कम्पनीको शेयर मूल्य बढेको छ भने ७८ वटा स्टकको मूल्य घटेको छ । १ वटा स्टकको मूल्य भने स्थिर रहेको छ । 

सोमबार १३ वटा स्टकको मूल्यमा १० प्रतिशतले बढेर सकारात्मक सर्किट लागेको छ । थप ४ वटा स्टकको मूल्य समेत ८ प्रतिशत भन्दा बढीले बढेको छ । नेपाल फाइनान्सको शेयर मूल्य भने १० प्रतिशतले घटेर नकारात्मक सर्किट लागेको छ ।