काठमाडौं- राष्ट्रिय विपद् जोखिम न्युनिकरण तथा व्यवस्थापन प्राधिकरणले मनसुनजन्य विपद न्यूनीकरणका लागि आवश्यक तयारी भइरहेको जनाएको छ ।

प्राधिकरणले बुधबार सिंहदरबारमा पत्रकार सम्मेलन गर्दै मनसुन पूर्वतयारी प्रतिकार्य कार्ययोजना सार्वजनिक गर्दै विपद न्यूनीकरणका लागि आवश्यक तयारी भइरहेको जनाएको हो ।

प्राधिकरणले योजनाअनुसार मनसुन सुरु भएदेखि अन्त्यसम्म राष्ट्रिय आपत्कालीन कार्यसञ्चालन केन्द्रमा नियमित कमान्ड पोस्टमा काम गरिने जनाएको छ ।

प्राधिकरणले यस वर्ष सरदरभन्दा धेरै बर्षा हुने सम्भावना रहेको भन्दै १८ लाख एक हजार मानिस र चार लाख हजार घर प्रभावित हुने अनुमान गरेको छ ।

पत्रकार सम्मेलनमा प्राधिकरणका कार्यकारी प्रमुख अनिल पोखरेलले मौसम पूर्वानुमानसम्बन्धी जानकारी लिएर जोखिम आँकलन गरी पूर्वतयारी र प्रतिकार्य योजना प्रभावकारी कार्यान्वयन गरिने बताए । यसका लागि विभिन्न निकायसँग समन्वय गर्दै अघि बढ्ने उनले बताए ।

प्राधिकरणले मनसुनजन्य विपदबाट जोगिन तीन दिनअघि नै मौसमको पूर्वानुमान गरी बुलेटिन जारी गर्ने र आपतकालीन प्रयोगका लागि ११४९ नम्बर प्रयोगमा ल्याइएको जनाएको छ ।

अत्यावश्यक स्थानमा तत्काल पुर्‍याउन सक्ने गरि एउटा प्रदेशमा कम्तीमा पनि ५ वटाका दरले सातै प्रदेशमा ३५ वटा बेलिब्रिज राख्ने प्रबन्ध भएको प्राधिकरणले जनाएको छ ।