काठमाडौं- उपेन्द्र यादव नेतृत्वको जनता समाजवादी पार्टी नेपाल (जसपा) बाट विभाजित अशोक राई नेतृत्व ‘जनता समाजवादी पार्टी’ले पदाधिकारी र केन्द्रीय समितिको टुंगो लगाएको छ ।

आइतबार खुसिबुमा बसेको नयाँ पार्टीको केन्द्रीय समिति बैठकले पदाधिकारी र केन्द्रीय सदस्यहरूको नाम टुंगो लगाएको हो ।

पार्टीका संघीय परिषद् अध्यक्ष राजेन्द्र श्रेष्ठ पार्टी जसपा नेपालकै निरन्तरता रहेको बताए । त्यहीअनुसार संगठनात्मक संरचना तय गरिएको निर्वाचन आयोग परिसरमा कुरा गर्दै श्रेष्ठले भने ।

जसपा नेपाललाई विभाजित गरिएपछ राईको नेतृत्वमा ७ जना प्रतिनिधिसभाका सांसद र केन्द्रीय कमिटीका ३० जनाले निवेदन दिएका श्रेष्ठले बताएका छन् ।

जसअनुसार अब श्रेष्ठ संघीय परिषद् अध्यक्ष बनेका छन् भने केन्द्रीय कमिटी अध्यक्ष अशोक राई भएका छन् ।

रेणुकुमारी यादवलाई सह-अध्यक्ष बनाइएको छ । उनी जसपा नेपालमा अध्यक्ष उपेन्द्र यादवनिकट नेतृ हुन् ।

उपाध्यक्षमा सप्तरीका नवलकिशोर साह सुडी, तेह्रथुमका रणध्वज लिम्बू,  ताप्लेजुङकी सुशीला श्रेष्ठलाई तोकिएको छ ।

त्यस्तै महासचिवमा बाँकेका मोहम्मद इस्तियाक राईलाई जिम्मेवारी दिइएको छ । उपमहासचिव जिम्मेवारी पर्साका प्रदीप यादवले पाएका छन् ।

सचिवमा धनुषाका दीपक कार्की र सप्तरीकी रञ्जु ठाकुरलाई तोकिएको छ । उता कोषाध्यक्षमा सिरहका डा. वीरेन्द्र महतोलाई जिम्मेवारी दिइएको छ ।