काठमाडौं – उपेन्द्र यादव नेतृत्वको जनता समाजवादी पार्टी नेपाललाई विभाजन गर्ने निर्णय गरेको अशोक राई नेतृत्वको समूहले अहिलेकै सरकारलाई निरन्तरता दिने भएको छ ।

यादव नेतृत्वको जसपा नेपाल छाडे र जनता समाजवादी पार्टी दर्ताका लागि पुगेका सांसद र नेताहरूले अहिलेको एमाले र माओवादी नेतृत्वको गठबन्धनमै बस्ने बताएका हुन्।

जसपा नामको नयाँ पार्टी दर्ताका लागि निर्वाचन आयोगमा निवेदन दिएपछि नेता राजेन्द्र श्रेष्ठले पुष्पकमल दाहाल प्रचण्ड नेतृत्वको सरकारलाई ऐतिहासिक भन्दै आफूहरू यसमै रहने बताएका छन्।

श्रेष्ठले जसपा नामको नयाँ हिजोको विधान र नीति तथा कार्यक्रमकै निरन्तरता भएको पनि जिकिर गरे। ‘राजनीतिक दलसम्बन्धी ऐन र नियमावली २०७८ अनुसार विभाजन गरिएको हो । दल विभाजनसम्बन्धी नियमावली २०७८ भदौमा राजपत्रमा प्रकाशित भएको छ’, उनले भने, ‘यही आधारमा हामीसँग प्रतिनिधिसभाका १२ मध्ये ७ जना बहुमत सांसद छन् । कानुनअनुसार हामीले बहुसंख्यक प्रतिनिधिसभाका सांसदहरूसहित जसपालाई नयाँ दलका रुपमा दर्ता गराउँदैछौँ ।’

उनले आफूहरूले अहिलेको सरकार नछाड्ने पनि बताए । ‘सरकारलाई हाम्रो समर्थन रहिरहन्छ। ऐतिहासिक रूपमा बनेको यो सरकारको निरन्तराको पक्षमा छौँ’, उनले भने, ‘राजनीतिक अस्थिरताको चर्चा भइरहेको छ । यस्तो बेलामा हामी सरकार छाडेर नयाँ समीकरणको पक्षमा छैनौँ।’

उता वन तथा वातावरणमन्त्री नवलकिशोर साह सुडीले पनि अहिले सरकार छाड्ने पक्षमा नरहेको बताए । उनले यही सरकारमा निरन्तर रहेर नयाँ शक्ति निर्माणमा सक्रिय हुने पनि जानकारी दिएका छन् ।