काठमाडौं– श्रीलंकन नागरिकहरूलाई वैदेशिक रोजगारको लागि विभिन्न युरोपेली देश पठाइदिन्छु भन्दै नेपालमा ल्याएर बन्धक बनाएको पाइएको छ । यस घटनामा संलग्नताको आरोपमा चार जना पाकिस्तानी नागरिकलाई काठमाडौं उपत्यका अपराध अनुसन्धान कार्यालयको टोलीले बिहीबार पक्राउ गरेको छ  ।

पक्राउ पर्नेमा पाकिस्तानी नागरिक ५७ वर्षीय जुबेर अम्जाद, ४२ वर्षीय शाहजेहान तानबिर, ६१ वर्षीय मलिक अब्दुल हमिद र ४४ वर्षीय आरिफ मसिह रहेका छन्  ।

ती श्रीलंकाली नागरिकहरूलाई क्यानडा, रोमानिया, ग्रिस लगायतका देशमा पठाइदिने विश्वास दिलाई श्रीलंकाबाट नेपाल ल्याई उपत्यकाका विभिन्न स्थानमा रहेका होटलमा राखेको प्रहरीले जनाएको छ ।

प्रहरीका अनुसार उनीहरूले पीडितको पासपोर्ट नियन्त्रणमा लिई विभिन्न किसिमका धाकधम्की दिई, कुटपिट गर्नुका साथै आफन्तसँग सम्पर्क गर्न नदिई साथमा रहेको नगदसमेत लिएर जबरजस्ती बन्धक बनाई राखेका थिए ।

प्रहरीले बन्धक रहेका श्रीलंकाली नागरिकलाई बिहीबार सकुशल उद्धार गरेको छ । भने, पक्राउ परेका पाकिस्तानी उपर अपहरण तथा शरीर बन्धक कसुरमा आवश्यक अनुसन्धान तथा कारबाहीका लागि जिल्ला प्रहरी परिसर, टेकु पठाइएको प्रहरीले जनाएको छ  ।