काठमाडौं– नेपाल राष्ट्रिय मुवाँथाईं संघले मुवाँथाईं विश्व च्याम्पियनसिपका पदक विजेता खेलाडी तथा प्रशिक्षकलाई नगदसहित सम्मान गरेको छ ।

संघले शुक्रबार काठमाडौंमा आयोजना गरेको कार्यक्रममा राखेपका सदस्य सचिव टंकलाल घिसिङले थाइल्यान्डको बैंककमा भएको १९ औं मुवाँथाईं विश्व च्याम्पियनसिपका पदक विजेता खेलाडी तथा प्रशिक्षकलाई नगदसहित सम्मान गरेका हुन् ।

संघले ५४ केसी सेमि प्रोफेशन स्वर्ण पदक प्राप्त गुणराज रुचाललाई रु एक लाख नगद सहित सम्मान गरेको छ । त्यस्तै ४५ केसी एमेच्योरतर्फ स्वर्ण पदक प्राप्त परिका बतासलाई रु ५० हजार, ५१ केजी सेमि प्रो रजत पदक प्राप्त सञ्जय राईलाई रु १० हजार , ५१ केजी एमेच्योर रजत प्राप्त सुशिल शाहलाई रु १० हजार नगर पुरस्कारसहित सम्मान गरिएको छ । त्यस्तै ५७ केजी एमेच्योर कास्य पदक प्राप्त गुमान घर्तीलाई पनि रु १० हजार सहित सम्मान गरिएको छ ।

कार्यक्रममा राखेप सदस्य सचिव घिसिङले राम्रो प्रशिक्षणका लागि खेलाडीहरूको राम्रो क्याम्पको व्यवस्था गर्ने र आवश्यक परे अन्य देशमा पनि प्रशिक्षणका लागि पठाइने बताए । उनले खेलाडीको विकासका लागि राखेप सदैव प्रयासरत रहने बताए ।

संघले प्रशिक्षक राहुल मोक्ता र सहायक प्रशिक्षक विगेन दराइलाई पनि समान १०/१० हजार पुरस्कारसहित सम्मान गरेको थियो ।