काठमाडौं– सिनेमा घरमा चलचित्र ‘पुजार सार्की’, ‘फर्की फर्की’ र ‘दान्भी’ जुध्ने भएका छन् । निर्माण पक्षले पुजार सार्की पनि जेठ १० गते प्रदर्शनमा लैजाने घोषणा गरेको हो ।

अनमोल केसीको मुख्य भूमिका रहेको ‘फर्की फर्की’ र पूजा शर्माको ‘दन्भी’ले यसअघि नै प्रदर्शन मिति घोषणा गरेको थिए । ‘पुजार सार्की’का निर्देशकले दिनेश राउतले शुक्रबार आफ्नो फिल्म पनि सोही मितिमा प्रदर्शनमा ल्याउने घोषणा गरेका हुन् ।

यसरी तीन फिल्म एकै चोटी जुध्नुले तीनै पक्षलाई घाटा पुग्ने देखिन्छ । ‘पुजार सार्की’ पनि जेठ १० मै प्रदर्शनमा आउनुलाई निर्देशक राउत र निर्माता रोहित अधिकारीको मनमुटाब रहेको बुझिएको छ ।

फिल्म ‘२६ करोड’ निर्माणका विषयमा रोहित र राउतका विषयमा सम्बन्ध चिसिएको थियो । यस विषयमा राउतले ‘क्रिएटिभ’ विषयमा विवाद भएर फिल्मबाट बाहिरिएको बताउँदै आएका छन् ।

पुजार सार्की छायांकनमा जाँदादेखि नै राउत रोहितसँग बदला लिन ‘फर्की फर्की’सँग जुधाउने तयारीमा छन् भन्ने चर्चा बाहिरिएको थियो । राउतले भने आफ्नै ढंगले फिल्म प्रदर्शनमा ल्याउने स्पष्टीकरण दिँदै आएका थिए ।

अन्ततः चर्चा सत्य भएको छ । पुजार सार्की र फर्की फर्की एकसाथ हलमा लाग्ने भएका छन् । पूजाको दान्भीसहित यी तीन फिल्म प्रतिस्पर्धा रोचक हुने भएको छ ।

पुजार सार्कीमा आर्यन सिग्देल, प्रदीप खड्का र पल शाहको मुख्य भूमिका रहेको छ । फिल्ममा अनुबन्ध भएका नायकहरुकै कारण यो फिल्म चर्चामा छ ।

सुयोग गुरुङको निर्देशन रहेको फिल्म फर्की फर्कीमा अनमोल र जसिता गुरुङ मुख्य भूमिकामा छन् । रोहित अधिकारी र आमे अग्रवालको संयुक्त लगानीमा फिल्म निर्माण हुँदै छ ।

रुपेश तामाङको निर्देशन रहेको ‘दान्भी’मा पूजा नै प्रमुख भूमिकामा छिन् । यो फिल्ममा देव मगर र अनुप गडालको संयुक्त लगानीमा बन्ने बताइएको छ ।

त्यस्तै, विकास सुवेदीको लेखन रहेको ‘पुजार सार्की’ निर्माता विकास सुवेदी हुन् ।