काठमाडौं- नेपालले आईसीसी विश्वकप क्रिकेट लिग-२ को त्रिकोणात्मक शृंखलामा सोमबार साविक विजेता स्कटल्यान्डको केहीबेरमा सामना गर्दैछ।

डालसस्थित ग्राण्ड पियरे क्रिकेट मैदानमा खेल नेपाली समयअनुसार राति १० : १५ बजे सुरु हुने खेलका लागि नेपाल क्रिकेट संघले टोली सार्वजनिक गरेको छ।

अमेरिका भ्रमणमा नेपालको यो अन्तिम खेलमा चोटका कारण करण केसी र भीम सार्की नदेखिने भएका छन् ।

तीव्र गतिका बलर केसी र ब्याटर सार्कीले त्रिकोणात्मक शृंखलाअन्तर्गत स्कटल्यान्डविरुद्धको खेल गुमाएपछि उनीहरूको स्थानमा देव खनाल र सागर ढकाललाई मौका दिइएको छ ।

देव ट्राभलिङ रिर्जभका रूपमा टोलीसँग थिए । यसअघि यसै शृंखलामा नेपालले स्कटल्यान्डलाई ५ विकेटले हराएको थियो ।

नेपालले त्यसपछि घरेलु टोली अमेरिकासँग तीन विकेट र ३७ रनले हारको स्वाद चाख्यो । ११ खेलबाट पाँच अंक जोडेको नेपाल सातौं स्थानमा छ । एक खेल कम खेलेको स्कटल्यान्ड १३ अंकसहित तेस्रो स्थानमा छ ।

नेपाल जारी शृंखलामा दोस्रो जितको खोजीमा छ । उता स्कटल्यान्ड तेस्रो जितको खोजीमा छ । स्कटल्यान्ड अमेरिकाविरुद्ध १० विकेट र ७१ रनले विजयी भइसकेको छ।

यसअघि नेपाल र स्कटल्यान्डबीच एकदिवसीय अन्तर्राष्ट्रियतर्फ सातवटा भिडन्त भएका छन् । जसमध्ये नेपालले चार र स्कटल्यान्डले तीनवटामा जित निकालेका थिए ।