काडमाडौं- सहकारी संस्थाको बचत हिनामिना भएपछि आन्दोलितहरूले राष्ट्रिय स्वतन्त्र पार्टी (रास्वपा)का सभापति रवि लामिछानेलाई चितवनमा कालोझण्डा देखाएका छन् ।

चितवन क्षेत्र नम्बर २ मा आफ्नो संसदीय कार्यकालको तेस्रो सार्वजनिक सुनुवाइमा सहभागी इच्छाकामना गाउँपालिकास्थित मुग्लिङ बजार पुगेका बेला शुक्रबार सहकारी पीडितहरूले नाराबाजीसहित कालोझण्डा देखाएका हुन् ।

सर्वाजनिक सुनुवाइ सकेर फर्किरहेका लामिछानेलाई मुग्लिङ बजारमा सहकारी पीडितहरूले कालोझण्डा देखाएका हुन् ।

त्यसक्रममा उनीहरूले ‘सहकारी ठग मुर्दावाद’, ‘सहकारी पीडितलाई न्याय दे’ र ’हाम्रो समस्या समाधान गर’ जस्ता नारा लगाएका थिए ।

नाराबाजीबीच प्रहरीले पूर्वगृहमन्त्रीसमेत रहेका लामिछानेलाई सुरक्षा दिएर भरतपुरतर्फ पठाएको छ।

सहकारी पीडितको विरोधका क्रममा रास्वपाका कार्यकताहरूसँग धकेलाधकेलसमेत भएको थियो ।

तर त्यहाँ तैनाथ प्रहरीले झडप रोकेको थियो । प्रर्दशनमा उत्रिएकाबाट प्रहरीले कालोझण्डा खोसेर तितरबितर पारेको छ ।

भरतपुरस्थित सहारा चितवन बहुउद्देश्य सहकारीबाट करिब १३ करोड बराबरको रकम गोर्खा मिडिया नेट्वर्कमा अवैध लगानी गरिएको थियो।

पीडितहरूले यसअघि पनि रविलाई भेटेरे आफूहरूको बचत फिर्ताका लागि पहल गरिदिन भनेका थिए। तर सुनुवाइ नभएपछि उनीहरू आन्दोलित भएका हुन् ।

करिब ६ वटा सहकारीको लगानी हालिएको गोर्खा मिडियामा रवि प्रबन्ध निर्देशक थिए ।