काठमाडौं– छैटौँ एशियाली जनसङ्ख्या सम्मेलन आगामी मंसिर १२ गतदेखि काठमाडौंमा आयोजना हुने भएको छ । 

त्रिभुवन विश्वविद्यालय, जनसङ्ख्या अध्ययन केन्द्रीय विभागले शुक्रबार ललितपुरमा पत्रकार सम्मेलन गर्दै नेपालको जनसङ्ख्या र विकासको भविष्यका लागि छैटौँ एसियाली जनसङ्ख्या सम्मेलन आगामी मंसिर १२ देखि १५ गतेसम्म काठमाडौंमा आयोजना हुने जनाएको हो ।

वर्तमान जनसाङ्ख्यिक सङ्क्रमण र जनसङ्ख्या र विकासमा यसको भावी प्रभाव अन्तर्राष्ट्रिय समुदायलाई अन्वेषण गर्ने उद्देश्यका साथ सम्मेलनको आयोजना गरेको विभागले जनाएको छ । 

विभागका प्रमुख एवं आयोजक समिति संयोजक प्रा.डा योगेन्द्र बहादुर गुरुङले सम्मेलनबाट प्राप्त निष्कर्षले नेपालको जनसाङ्ख्यिक समस्या, पहिचान र सुझावसहितको नीतिनिर्मातालाई भविष्यको जनसङ्ख्यासम्बन्धी नीति तथा कानुन निर्माणमा सहयोग पुग्ने विश्वास व्यक्त गरे । 

सम्मेलनमा दक्षिण एशिया बाहेकका देशबाट सय जना, दक्षिण एशियाबाट १७० जना र नेपालबाट सय जना सहभागीहरूले नाम दर्ता गराएको उनले जानकारी दिए ।

चारदिनसम्म चल्ने सम्मेलनका लागि करिव ५ करोड रुपैयाँ खर्च हुने अनुमान गरिएको छ ।