काठमाडौं- नेकपा महासचिव नेत्रविक्रम चन्द (विप्लव)सँग नेपालका लागि क्युबाका कार्यवाहक राजदूत अबेल अबेलाले बुधवार भेटवार्ता गरेका छन् ।

भेटमा महासचिव विप्लवले क्युबाका कार्यवाहक राजदूत अबेलासँग साम्राज्यवादविरुद्ध क्युबाली जनताको सङ्घर्षप्रति ऐक्यबद्धता जनाए ।

भेटवार्ताका क्रममा नेपाली क्रान्तिका लागि दुई देशबीच महत्त्वपूर्ण समन्वय र साझेदारी आवश्यक रहेकोबारे दुईजनाले चर्चा गरेका थिए ।

भेटमा क्युबाको शिक्षा र राजनीतिलाई नेपाली मौलिकतामा उतारेर अगाडि बढ्नु आवश्यक रहेकोबारे कुरा भएको थियो ।

त्यसमा आफूहरू सकारात्मक रहेको विप्लवले बताएको नेकपाका केन्द्रीय प्रचार विभाग सदस्य प्रकाश डुम्रेले बताए ।

भेटमा नेकपाका अन्तर्राष्ट्रिय विभाग सदस्य खगेश्वर केसी, नेकपाका केन्द्रीय सदस्य प्रकाश शाही लगायत सहभागी थिए ।

क्युबा चर्चित कम्युनिष्ट नेताहरू चे ग्वेभारा, फिडेल क्यास्ट्रो र राउल क्यास्ट्रोले क्रान्ति गरेको एक देश हो । जसले अहिले पनि अमेरिकासँग संघर्ष गरिरहेको छ।