काठमाडौं- प्रमुख सत्तारुढ नेकपा (एमाले) को पोलिटब्युरो बैठकमा अध्यक्ष केपी शर्मा ओलीले पार्टीमा अनुशासनहीन कृयाकलाप बढ्दै गएको भन्दै आक्रोश पोखेका छन् ।

ललितपुरको च्यासलस्थित पार्टी केन्द्रीय कार्यालयमा बसेको बैठकमा ओलीले नेता कार्यकर्ताहरूलाई कि राजनीति रोज्न कि त मोजमस्ती रोज्न भनेका छन् ।

पार्टी प्रचार विभाग प्रमुख राजेन्द्र गौतमका अनुसार अध्यक्ष ओलीले यसअघिको ‘समृद्ध नेपाल र सुखी नेपालीको’ आकांक्षासहित एमाले अघि बढेको बताएका थिए ।

एमाले स्वतन्त्रतापूर्वक निर्णय गर्न सक्ने निर्णायक शक्ति भएको ओलीले स्पष्ट पारेको पनि गौतमले बताए ।

तर ओलीले पार्टीभित्र अराजकता बढेको भन्दै आक्रोश पोखेका थिए । उनले पार्टीभित्र नेताहरू नैतिकहीन,गतिहीन र चरित्रहीन भए भन्ने कुरा उठेका बताएका थिए ।

गौतमकाअनुसार त्यसमा ओलीले एमाले कुनै सम्झौता नहुने कुरा स्पष्ट शब्दमा राखेका थिए । ‘उहाँ (अध्यक्ष ओली) ले राजनीति र इनज्वय दुवै गर्न पाइँदैन, कि राजनीति गर कि इनज्वय गर भनेर भन्नुभयो’, गौतमले बैठकपछि पत्रकारहरूलाई भने ।