काठमाडौं- नेकपा एमालेकी प्रदेशसभा सदस्य रेखा शर्मालाई कारबाही नभएको भन्दै रिसाएका काठमाडौं महानगरपालिकाका मेयर बालेन्द्र साहका समर्थकले चलाएको अभियानका कारण प्रधानमन्त्री केपी शर्मा ओलीलाई फेसबुकबाट ७६ हजार फलोअर्स गुमाएका छन् ।

बालेन्द्रका समर्थक र फ्यानले चलाएको ‘अनफलो’ अभियानका कारण ‌ओलीले यो क्षति ब्यहोरेका हुन् । एमाले प्रदेश सभा सदस्य शर्माबारे राखेको फेसबुक पोस्ट मास रिपोर्टमा परेपछि बालेन्द्र आक्रोशित भएका थिए ।

बालेन्द्रले आफू दोषी भए कारबाही गर्न भन्दै फेसबुकमा स्टाटस लेखेपछि उनका फ्यान पनि ओलीमाथि खनिएका थिए । मंगलबार अपराह्न मेयर बालेनले आफ्नो स्टाटसलाई फेसबुकले हटाइदिएको उनको सचिवालयले दाबी गरेको थियो ।

कसैले रिपोर्ट गरेका कारण उक्त पोस्ट फेसबुकले डिलिट गरिदिएको सचिवालयले दाबी गरेको थियो । त्यसपछि मंगलबार नै बालेनले पोस्ट हटाउने होइन, दोषीलाई करावाही गर्नुपर्यो भन्ने पोस्ट सरकारले हटाइदिएको आशयको स्टाटस लेखेका थिए । त्यसपछि बालेनका समर्थकहरूले ओलीलाई अनफलो थालेका थिए ।

मंगलबार प्रधानमन्त्री ओलीको पेजमा ६ लाख ६६ हजार फलोअर्स रहेकोमा बुधबार यो समाचार तयार पार्दासम्म ५ लाख ९० हजार पुगेको छ । अहिलेसम्म उनलाई ७६ हजारले अनफलो गरेका छन् ।

बालेनले भदौ १६ गते एमालेकी प्रदेश सांसद रेखा शर्माले नाबालिकालाई घरेलु कामदार राखेर हिंसा गरेको दाबीसहित फेसबुकमा एउटा पोस्ट गरेका थिए ।

सांसद शर्माको विषयमा कुनै कारबाही नभएको बताउँदै बालेनले प्रधानमन्त्री ओलीमाथि आक्रोश पोखेका थिए । सो पोस्ट हटेपछि सुरु भएको विवादले अब एक अर्काका पेज अनफलो गर्ने अभियानसम्म पुगेको छ ।