काठमाडौं – अमेरिकी अन्तरिक्ष संस्था नासाले भारतीय पाइलटलाई अन्तरिक्षमा पठाउने भएको छ । भारतीय अन्तरिक्ष एजेन्सी इसोरो तथा अमेरिकी निजी अन्तरिक्ष कम्पनी एक्सियोमबीच भएको सम्झौताबमोजिम नासाले अन्तर्राष्ट्रिय अन्तरिक्ष केन्द्रमा लैजान लागिएको हो ।

इण्डिया टुडेका अनुसार अन्तरिक्ष उडानको नेतृत्व भारतीय वायुसेनाका ग्रुप क्याप्टेन शुभांशु शुक्लाले गर्नेछन् । भारतीय वायुसेनाका अर्का ग्रुप क्याप्टेन प्रशान्त बालकृष्णन् नायरलाई ब्याकअपमा राखिएको छ ।

दुबै पाइलटको तालिम चाँडै शुरु हुने अपेक्षा गरिएको छ । भारतले महत्वकांक्षी गगनयान अभियानका लागि नासासँग सहकार्य गरेको हो । अन्तरिक्षयात्रा गर्ने भारतीय पाइलटलाई ‘गगनयात्री’ भनेर बोलाइने भारतीय सञ्चार माध्यमले जनाएका छन् ।

भारतले गगनयान अभियानअन्तर्गत चाँडै मानवलाई अन्तरिक्ष यात्रामा लैजाने उद्देश्य लिएको छ ।