काठमाडौं – फिल्म ‘रोल नं. १’ बन्ने भएको छ । सेभेन सिज सिनेमाले आइतबार सो फिल्म निर्माणको घोषणा गरेको हो । निर्माण पक्षले तिहारपछि छायांकनमा निस्कने जानकारी दिएको छ । यद्यपि कलाकारको अनुबन्धबारे केही खुलाएको छैन ।

सेभेन सिजका अनुसार फिल्म बाल मनोविज्ञानको कथामा आधारित रहेको छ । फिल्मको फस्टलुक पोस्टर पनि सार्वजनिक भएको छ । सो पोस्टरमा कक्षाकोठामा एक बालक हात उठाएर आफ्नो उपस्थिति जनाइरहेको देखाइएको छ । उसको पृष्ठभूमिमा निलो सर्ट लगाएका विद्यार्थी र उनीहरुलाई पढाईरहेकी एक शिक्षिका देख्न सकिन्छ ।

सेभेज सिजको ब्यानरमा बन्ने यस फिल्ममा जोन योञ्जनको कथा र निर्देशन रहनेछ भने महेश दवाडीको पटकथा तथा संवाद रहने बताइएको छ । सेभेन सिजको यो तेस्रो फिल्म हो । यो ब्यानरको दोस्रो फिल्म ‘पूर्ण बहादुरको सारङ्गी’ पोस्ट प्रोडक्सनमा छ । दशैको अवसर पारेर प्रदर्शन गर्ने लक्ष्यमा निर्माण पक्ष रहेको छ ।

त्यसअघि बनेको फिल्म ‘अगस्त्य च्याप्टर १’ प्रदर्शनमा आइसकेको छ ।