मुगु – मुगुको सोरुगाउँपालिकाले पालिका र वडाबाट सञ्चालन हुने विकास योजनाका लागि आर्थिक वर्षको सुरुआतमै श्रमिक छनोट गर्ने भएको छ ।

गरिब तथा विपन्न परिवारबाट श्रमिक छनोटगरी उनीहरुको आर्थिक अवस्थामा सुधार ल्याउने लक्ष्य राखेको छ । सोरु गाउँपालिकाका उपाध्यक्ष केशरजङ्ग शाहीका अनुसार आगामी आर्थिक वर्षबाट पालिकाबाट सम्पन्न हुने सबै योजनामा खटिने श्रमिक वडावडामा छनोट हुनेछन् ।

छनोट भएका श्रमिकले मात्र पालिकाभित्रका योजनामा काम गर्न पाउनेछन् । त्यस्ता श्रमिकको पारिश्रमिक पालिकाले सिधै श्रमिककै खातामा जम्मा गरिदिने उपाध्यक्ष शाहीले बताए ।

काम गर्ने तर भुक्तानी उपभोक्ता समतिको खातामा जाँदा गरिब तथा विपन्न श्रमिकले ज्याला नपाउने घटना धेरै भएकाले पालिकाले प्रशासनिक खर्च, निर्माण सामग्रीबाहेकका श्रमिकहरुको ज्याला उनीहरुको कामका आधारमा सिधै श्रमिककै बैंक खातामा पठाउने व्यवस्था गरेको गाउँपालिकाका प्रमुख प्रशासकीय अधिकृत तीर्थराज शाहीले जानकारी दिए ।

प्रमुख प्रशासकीय अधिकृत शाहीका अनुसार श्रमको सम्मानस्वरुप यसअघिदेखि सोरु गाउँपालिकाले श्रमिकको व्यक्तिगत बैंक खातामार्फत भुक्तानी दिँदै आएको छ । हालसम्म पालिकाभरिका दुई हजार श्रमिकको बैंक खातामार्फत ज्याला भुक्तानी लिइसकेका छन् ।

विगतमा सञ्चालित योजना पारदर्शी, गुणस्तरीय नभएको, डिजाइन अनुमान लागतअनुसार काम नगरिएको र कामदारले ज्याला नपाएकोजस्ता समस्याले अख्तियार दुरुपयोग अनुसन्धानमा धेरै मुद्दा परेका थिए ।

स्थानीय तहमा सञ्चालन हुने यस्ता अभियानले मुलुकमा विद्यमान बेरोजगारी र गरिबीको समस्या सम्बोधन गर्ने र सरकारले लिएको दिगो आर्थिक विकास हासिलको लक्ष्यप्राप्ति हुने गाउँपालिकाले जनाएको छ ।