काठमाडौं- राष्ट्रिय स्वतन्त्र पार्टी (रास्वपा) का निलम्बित महामन्त्री डा. मुकुल ढकालले पार्टीभित्र अरूलाई गालीमात्रै गर्ने प्रवृत्ति देखिएको बताएका छन् ।

उनले पार्टीमा गाली र आरोप-प्रत्यारोप गर्ने मात्रै प्रवृत्ति देखिएको बताउँदै आफ्नो ‘भिजन’ र ‘प्लान’ केही देखाउन नसकिएको स्वीकारेका छन् ।

सभापति रवि लामिछानेलाई गत बुधबार नै बुझाएको समीक्षा यात्राको बिहीबार सार्वजनिक प्रतिवेदनमा उनले पार्टीका कमीकमजोरी केलाउँदै यस्तो स्वीकारेका हुन् ।

‘अरूलाई गालीमात्रै गर्ने प्रवृत्ति देखियो । आफ्नो ‘भिजन’, ‘प्लान’ केही देखाउन सकिएन,’ ढकालले भनेका छन्, ‘लिटरल ईन्ट्री (पार्श्व प्रवेश) र संगठन निर्माण, दुईटामा एउटा रोज्न पर्‍यो वा यसको संयोजन कसरी हुन्छ ? व्याख्या हुनुपर्‍यो ।’

निलम्बित महामन्त्री ढकालले पार्टीले सस्तो लोकप्रियतालाई प्राथमिकता दिइएको, फोटो खिचेर ठूलो मान्छे भइन्छ भन्ने प्रवृत्ति देखिएको पनि टिप्पणी प्रतिवेदनमा गरेको पाइएको छ ।

‘सस्तो लोकप्रियतालाई प्राथमिकता दिइयो । पार्टीभित्र निषेधको राजनीति मौलाएको छ,’ प्रतिवेदनमा भनिएको छ, ‘फोटो खिचेर ठूलो मान्छे भइन्छ भन्ने प्रवृत्ति देखियो ।’

सुरूवाती यात्रामा राजनीति गर्न काम नछोडौं भनिए पनि पछिल्लो समय राजनीति गर्न काम छोड्नु पर्ने बाध्यता भइसकेको ढकालको भनाइ छ ।

‘प्रतिस्पर्धी भावना र खुट्टा तानातान प्रवृत्ति देखियो । पार्टीभन्दा व्यक्तिलाई बलियो बनाउने गरी दौडधुप भयो,’ प्रतिवेदनमा लेखिएको छ ।

• यस्तो छ मुकुल ढकाललाई संकटमा पार्ने प्रतिवेदन (पूर्णपाठ) 
• मुकुलले समीक्षा यात्राको प्रतिवेदनमै लेखे- मलाई घोक्र्याएर पार्टीबाट निकाल्न सक्छन्