काठमाडौं– सित्तैमा विद्युत् पाउने भएपछि भारतको पञ्जाबमा सौर्य ऊर्जा जडान गर्ने घरधुरीको सङ्ख्यामा कमी आएको पाइएको छ।

सरकारले पञ्जाबमा ३ सय युनिट विद्युत प्रतिमहिना सित्तैमा प्रदान गर्न थालेसँगै सौर्य ऊर्जा जडान गर्ने घरधुरीको सङ्ख्या घट्न थालेको हो ।

खालसाभक्सका अनुसार खासगरी फरिदाकोट र अमृतसरमा सौर्य ऊर्जा जडान गर्ने घरधुरी घटेका छन् । जालन्धरका सौर्य ऊर्जा जडान गर्ने एक जना विज्ञ परमिन्दर सिंहका अनुसार उच्च लागतका कारण पनि मानिसहरु सौर्य ऊर्जा जडान गर्न हच्किने गरेका छन् ।

उनका अनुसार सौर्य ऊर्जाको प्यानल जडान गर्न डेढदेखि दुई लाख भारतीय रुपैयाँसम्म लाग्दै आएको छ ।

समाचारमा जनाइएअनुसार र ३ सय युनिट प्रतिमहिनाभन्दा धेरै विद्युत् प्रयोग गर्ने घरधुरीले भने अझै पनि सौर्य प्यानल जडान गर्ने गरेका छन् । त्यसबाहेक पछिल्लो समय सौर्य प्यानल निजी आवासीय भवनभन्दा पनि सरकारी कार्यालयमा बढी जडान हुने गरेको छ ।