काठमाडौं – पुरुष टी२० विश्वकप २०२४ मा नेपालले आज पहिलो खेल खेल्दैछ । अमेरिकाको टेक्सासस्थित ग्रान्ड प्रेयरी रंगशालामा नेपाल र नेदरल्याण्ड्सबीच प्रतिष्पर्धा हुन लागेको हो ।
नेपाली समयअनुसार सवा ९ बजे शुरू हुने भनिएको खेल वर्षाका कारण धकेलिएको छ । जारी विश्वकपको समूह ‘डी’ मा रहेका दुबै टोलीले आजको खेलमा हाबी हुँदै विजयी यात्रा शुरू गर्न चाहेका छन् ।
सन् २०१४ मा बंगलादेशमा आयोजित टी२० विश्वकपपछि विश्व क्रिकेट महासंग्राममा नेपालले यो पटक संघर्ष गर्न लागेको हो । नेदरल्याण्ड्स भने छैटौं पटक सहभागी हुँदै गरेको हो ।
टी२० अन्तराष्ट्रिय वरियतामा नेदरल्याण्ड्स १५औं र नेपाल १७औं स्थानमा छ । पछिल्ला खेलमा दुबै टोली चिरप्रतिष्पर्धी देखिएका थिए । दुई राष्ट्रिय टोलीबीच १२ वटा टी२० प्रतिष्पर्धा भएकामा ६ खेलमा नेदरल्याण्ड्स र पाँच खेलमा नेपाल विजयी भएको छ ।
एक खेल भने अनिर्णित भएको छ । सन् २०१८ २९ जुनमा लर्ड्स खेलिएको खेल अनिर्णित भएको थियो ।
प्रतिक्रिया