काठमाडौं– राष्ट्रिय प्रजातन्त्र पार्टी (राप्रपा) अध्यक्ष राजेन्द्र लिङ्देनले ८९औँ पटक रक्तदान गरेका छन् ।

पार्टी सम्बद्ध राष्ट्रिय प्रजातान्त्रिक युवा संगठन उपत्यका विशेष कमिटीले आज काठमाडौँमा आयोजना गरेको रक्तदान कार्यक्रममा लिङ्देनले रक्तदान गरेका हुन् ।

अध्यक्ष लिङ्देनले हरेक तीन महिनामा रक्तदान गर्ने गरेका छन् । उनले आफूलाई रक्तदान जस्तो पवित्र कार्य गर्न पाउँदा सन्तोषको अनुभूति हुने गरेको बताए ।

उनले भने, ‘कोभिड भएका बखत चिकित्सकको सल्लाह अनुसार नै मनले चाहेर पनि केही समय रक्तदान गर्न पाइन, शरीर स्वस्थ भएपछि रक्तदान सुरु गरेको हुँ, आज मैले ८९औँ पटक रक्तदान गरेँ ।’

बिरामीलाई रगतको अभाव हुन नदिन रक्तदानलाई निरन्तरता दिनुपर्ने र राप्रपाको युवा सङ्गठनले समय समयमा यस्तो कार्य गर्ने गरेकोमा प्रशंसा समेत गरे ।

दलको भ्रातृ सङ्गठनले दलीय गतिविधिमा मात्रै होइन सिर्जनशील र रचनात्मक कार्यमा सहभागी हुँदै सामाजिक दायित्व निर्वाह गर्नुपर्नेमा समेत उनको जोड थियो ।

कार्यक्रममा ६३ जनाले रक्तदान गरेको सङ्गठनका उपत्यका विशेष कमिटीका अध्यक्ष सञ्जय कार्कीले जानकारी दिए ।