तेह्रथुम – तेह्रथुमको लालीगुराँस नगरपालिकामा रहेको चोःलुङ पार्क पछिल्लो समय पर्यटनको आकर्षणको केन्द्र बनेको छ।

वसन्तपुर बजार नजिकै करिब पाँच रोपनी क्षेत्रफलमा फैलिएको चोःलुङ पार्क परम्परागत शैलीका घर, लिम्बु परम्परा झल्काउने गाडिएको ढुङ्गा, ढुङ्गा नै छापिएर बनाएको संरचना पक्कै पनि सुन्दर छन्।

घरमा मकै झुण्ड्याइएको छ, कुनै घरमा खरले छाइएको छ भने कतै झिगंटीको छानो लगाइएको छ। घरभित्र परम्परा झल्काउने सामाग्री सजाएर राखिएको छ। यो ठाउँ पुग्दा प्राचिनताको अनुभूती हुन्छ।

पार्कमा संरचना र राखिएका सामग्री मौलिकमात्र छैन, इतिहासका विभिन्न कालखण्डको स्मरण गराउने किसिमका छन्। मुन्धुममा आधारित संरचना र सामग्री भेटिन्छ। यो ठाउँ गुराँसको राजधानी भनेर प्रख्यात रहेको टिएमजे (तीनजुरे–मिल्के–जलजले) क्षेत्रको काखमा रहेको छ।

लालीगुराँस नगरपालिकाको केन्द्र वसन्तपुरमा रहेको यो पार्क घुम्न आउनेको रोजाइमा पर्छ। यसले परम्पराको झल्को दिने तथा पुराना सामग्रीको पुनः स्मरण गराउने काम गरेको छ। लिम्बु जातिको आदिम संस्कृति र परम्परा झल्काउने संरचना बनाइएको छ। गुराँसको बगैँचामा रमाउन आइपुग्ने हजारौँ पर्यटक परम्परा झल्काउने पार्कमा समेत रमाउन थालेका छन्।

अध्ययन, अनुसन्धान गर्ने पनि बाक्लो गरी आउने गरेका छन्। तीनजुरे मिल्केमा २५ प्रजातिका गुराँस पाइने अनुसन्धानकर्ता कमल मादेन बताउँछन्।