पोखरा– गण्डकी प्रदेशका मुख्यमन्त्री खगराज अधिकारीले आइतबार (भोलि) विश्वासको मत लिने भएका छन् । विश्वासको मत प्रयोगजनका लागि आइतबार दिउँसो ३ बजे प्रदेशसभा बैठक आह्वान गरिएको छ ।

एमाले, माओवादी केन्द्र र दीपक मनाङेको समर्थनमा एमाले संसदीय दलका नेता अधिकारी गत चैत २५ गते मुख्यमन्त्री नियुक्त भएका थिए ।

मुख्यमन्त्री अधिकारीले सभामुखलाई गणना गरेर दाबी पेस गरेपछि निवर्तमान मुख्यमन्त्री कांग्रेस संसदीय दलका नेता सुरेन्द्रराज पाण्डेले गत चैत २७ गते सर्वोच्चमा रिट दायर गरेका थिए । सर्वोच्च अदालतले वैशाख १७ गते खारेज गरिदिएपछि अधिकारीले विश्वासको मत लिन लागेका हुन् ।

सर्वोच्चले सभामुखबाहेक पनि खगराजको पक्षमा ३० जना रहेकाले बहुमत प्राप्त गर्न सक्ने व्याख्या गर्दै रिट खारेज गरिदिएपछि विश्वासको मत लिने सवालमा बहुमतका लागि कति संख्या जरुरी हो भन्ने विषयमा पक्ष र विपक्षमा विभिन्न धारणाहरु आइरहेका छन् ।

६० सदस्यीय प्रदेशसभामा अधिकारीलाई नेकपा एमाले २२, माओवादी केन्द्रका सभामुखसहित ८ र एक स्वतन्त्र सांसद गरी ३१ जनाको समर्थन रहेको छ । यस्तै नेपाली कांग्रेसका २७ र राप्रपाका २ जना सांसद छन् ।