बागमती– नक्कली तथा झुटा बिल भर्पाई पेस गरी भ्याट अर्थात् मूल्य अभिवृद्धि कर छल्ने मकवानपुरका नौ जना व्यवसायीलाई छलिएको राजस्वसहित जरिवाना गरिएको छ । 

आन्तरिक राजस्व कार्यालय हेटौँडाका अनुसार ती व्यवसायी माथि जरिवानासहित रु छ करोड २७ लाख ६८ हजार एक सय ५८ कर निर्धारण गरिएको छ ।

साथै जरिवानासहित निर्धारण गरिएको रकम बुझाउनका लागि आन्तरिक राजस्व कार्यालय हेटौँडाले ताकेतासमेत गर्दै आएको जनाएको छ । 

कार्यालय प्रमुख तुलसी भट्टराईका अनुसार नक्कली तथा झुठा बिल भर्पाई पेस गरी राजस्व छल्नेमाथि लामो समयको अनुसन्धानपश्चात् जरिवानासहित कर निर्धारण गरिएको छ । तोकिएको राजस्व बुझाउनका लागि सम्बन्धित व्यवसायीलाई पटकपटक पत्रसमेत दिइएको बताइएको छ ।

कार्यालयबाट प्राप्त विवरणअनुसार आर्थिक वर्ष २०७२-७३ देखि २०७५-७६ सम्म राजस्व छल्ने काम भएको तथा त्यसबापत जरिवानासहित छ करोड २७ लाख ६८ हजार एक  सय ५८ राजस्व तोकिएको उनले बताए । ती नौ जना व्यवसायबाट मूल्य अभिवृद्धि करको नक्कली बिलबापत  एक करोड ७५ लाख १३ हजार ७८८ तथा थप जरिवानासहित आयकर निर्धारण चार करोड ५२ लाख ५४ हजार तीन सय ७० गरी कूल रु छ करोड २७ लाख ६८ हजार १५८ राजस्व बक्यौता रहेको छ ।

पटकपटक ताकेता गरेपछि एक जना व्यवसायीबाट एक लाख ३४ हजार ९३८ मूल्य अभिवृद्धिकरसहित जरिवाना रकम असुल भइसकेको सो कार्यालयले जनाएको छ ।

यसैबीच सो कार्यालयले चालू आर्थिक वर्ष २०८०-८१ को फागुन मसान्तसम्ममा रु चार अर्ब छ करोड ३८ लाख राजस्व संकलन गरेको छ । प्राप्त विवरणमा सो अवधिमा आयकरतर्फ रु ७१ करोड ४३ लाख तथा  अन्तशुल्कबापत रु दुई अर्ब २४ करोड तथा मूल्य अभिवृद्धि करबापत रु ७१ करोड ४६ लाख राजस्व संकलन भएको सो कार्यालयले जनाएको छ । सो राजस्व लक्ष्यको ७६ प्रतिशत संकलन भएको हो ।