इस्लामावाद- पाकिस्तानको मुद्रास्फीति अझै उच्च रहेको पाइएको छ । यस वर्षको जनवरी महिनामा पाकिस्तानको मुद्रास्फीति २८ दशमलब ५ प्रतिशत रहेको तथ्यांकले देखाएको छ ।

पाकिस्तानबाट प्रकाशित हुने द एक्सप्रेस ट्रिब्युनले जनाएअनुसार खाद्यान्नको आपूर्तिमा झड्का लागेसँगै मुद्रास्फीति उच्च हुन पुगेको हो । त्यसबाहेक तरकारी, विद्युत र ग्यासको मूल्यमा भएको वृद्धिले पनि मुद्रास्फीतिलाई बढाएको पाकिस्तानको वित्त मन्त्रालयले जनाएको छ ।

भारतीय समाचार संस्था एएनआईका अनुसार तथ्यांक प्रकाशित हुनु दुई दिनअघि मात्रै पाकिस्तानको केन्द्रीय बैंकले मुद्रास्फीतिको पूर्वानुमानलाई बढाएको थियो । पाकिस्तानले पछिल्लो समय तीव्र आर्थिक संकटको सामना गरिरहेको छ ।

पाकिस्तानको केन्द्रीय बैंक स्टेट बैंक अफ पाकिस्तानले आर्थिक वर्ष सन् २०२४ मा मुलुकको मुद्रास्फीति २३ देखि २५ प्रतिशतसम्म रहने प्रक्षेपण गरेको छ ।