काठमाडौं- काठमाडौं महानगरपालिकाका मेयर बालेन्द्र साहका एकजना सल्लाहकारले साथ छाडेका छन् ।

महानगरका प्रमुखस्तरीय निर्णयबाट २०८० जेठ ३१ गते अवैतनिक सम्पदा सल्लहाकारमा नियुक्त यादवलाल कायस्थले पद त्यागेको घोषणा मंगलबार गरेका हुन् ।

नेवा संस्कृतिक संरक्षणको अभियन्ताका रुपमा परिचित उनले मेयर साहको कार्यशैलीमा चित्त नबुझेर पद त्याग गरेको बताएका छन् । हिटी म्यान (ढुङ्गेधारा संरक्षण र पुन:स्थापनामा सक्रिय) उनले आफू कसैको पनि एकोहोरो समर्थक नरहेको बताएका छन् ।

परम्परागत गुठी व्यवस्था संकटमा परेका बेला चलेको आन्दोलनको नेतृत्व पनि उनैले गरेका थिए । कायस्थ चोरी भएका मूर्ति फिर्ता ल्याउने र पुन:स्थापना अभियानमा क्रियाशील छन् ।

‘म कुनै पनि संघ, संस्था, निकाय र राजनीतिक दलको विरोधी हुन सक्दिनँ । तर म कसैको ‘अ…’ समर्थक पनि होइन’, उनले भनेका छन्, ‘मैले काठमाडौं महानगरपालिकाको प्रमुखको सम्पदा सल्लाहकारको पद छोडेको छु । कसैले पनि किन छोडेको किन छोडेको नसोध्नु होला । समय बित्दै गएपछि सबैले अवश्य जवाफ पाउनु हुनेछ ।’

उनले बालेनको सल्लाहकार पद छाडे पनि कसैको विरोध नगर्ने बताएका छन् । ‘पदमा हुँदा कामसँगै विरोध पनि गरेँ । सुधार्ने र सच्याउने भनेको आफ्नै ले हो भनेर विरोध गर्ने गरेको छु’, उनले भनेका छन्, ‘तर अब म अलग भइसकेको छु । मैले काठमाडौं महानगरपालिका प्रमुखको नाम कतै लिँदै लिन्नँ । मलाई कसैले यो विषयमा सोध्न नआउनु होला ।’

उनले बालेनको सल्लाहकार पद छाडे पनि सम्पदा संरक्षणको विषयमा भने जस्तो अवस्थामा पनि खटिरहने प्रतिवद्धता जनाएका छन् ।