काठमाडौं– भदौ २१ देखि प्रदर्शनमा आउने फिल्म ‘देवी’को टिजर सार्वजनिक भएको छ । निर्माण पक्षले शनिबार १ मिनेट ३० सेकेण्ड लामो टिजर युट्युबमार्फत सार्वजनिक गरेको हो । 

फिल्म समाजमा घट्ने बलात्कार, त्यसको अनुसन्धानमा कानुनले पार्ने प्रभाव र निम्त्याउने परिणामको कथामा बनेको टिजरबाट बुझ्न सकिन्छ । फिल्ममा केही वर्षअघि बलात्कारपछि हत्या भएकी कञ्चनपुरकी बालिका निर्मला पन्तको घटना पनि समावेश भएको प्रष्ट हुन्छ। 

क्राइम थ्रिलर जनरामा निर्माण भएको फिल्मका निर्देशक सञ्जोग राई हुन् । उनले अजय गौतमसँग मिलेर कथा लेखेका छन् ।

फिल्ममा शिल्पा मास्के, गौरव पहारी, नाजिर हुसेन, टीका पहारी, प्रभाकर न्यौपानेलगायतको अभिनय रहेको छ । 

एक्जिबिट स्टुडियोको प्रस्तुतिमा बनेको यो फिल्मले सार्वजनिक प्रदर्शनका लागि बाँसुरी फिल्म्ससँग सहकार्य गरेको छ ।