मोरङ – मोरङमा विदेशबाट फर्किएका महिलाहरुलाई नौमती बाजा बजाउने तालिम दिन सुरु गरिएको छ।

आमकास नेपाल मोरङको आयोजना तथा सुन्दरहरैचा नगरपालिका–१२ को सहयोगमा ९ जना महिलाहरुलाई नौमती बाजा बजाउन १५ दिनको तालिम दिन सुरु गरिएको हो ।

नयाँ पुस्तामा नौमती बाजाप्रतिको घट्दो आकर्षण र ती बाजा बजाउने मानिसहरूको समेत अभाव भइरहेका बेला आमकास नेपाल मोरङ र सुन्दरहरैचा नगरपालिका–१२ को सहयोगमा नौमती बाजाको संरक्षण र प्रवद्धनका लागि स्थानीय महिलालाई नौमती बाजा प्रशिक्षणको तालिम सञ्चालन गरिएको आमकास नेपाल मोरङकी अध्यक्ष उमदेबि सेढाईले बताइन् ।

तालिमको उद्घाटन गर्दै वडा–१२ का वडाअध्यक्ष तथा सुन्दरहरैचा नगरपालिकाका प्रवक्ता रोशनप्रसाद ढकालले विदेशबाट फर्किएका महिलाहरुलाई पनि आत्मनिर्भर बनाउन र आधुनिक बाजाको प्रभावले नेपाल र नेपालीको मौलिकता ओझेलमा परिरहेको महसुस गरी मौलिक बाजाको प्रशिक्षणमार्फत सांस्कृतिक जगेर्ना गर्न नगरपालिकाले तालिमको आयोजना गरेको बताए।

कला संस्कृतिको जगेर्नामा सबै जाति र समुदाय लिङ्गको दायित्व बराबरी हुनेभएकाले समेत महिलालक्षित तालिमको आयोजना गरिएको वडा सदश्य निलम थापाले बताइन् । महिला दिदीबहिनीहरुले पनि पन्चे बाजा बजाउन रहर गरेको र सिकिसकेपछि यही बाजा बजाएर भएपनि घर खर्च चलाउने मनसाय ब्यक्त गरेकाले पनि तालिम सुरु गरिएको बताइन् ।

तालिमपछि एक सेट नौमती बाजा समेत प्रदान गरिने र उनीहरुलाई बिबाह तथा अन्य कार्यक्रमा सहभागी गरिने बताइएको छ।