काठमाडौं– उपेन्द्र सुब्बाको निर्देशन रहेको फिल्म ‘मनसरा’ले प्रदर्शनको पहिलो दिन शुक्रबार दर्शकबाट राम्रो साथ पाएको छ । विशेषगरी पूर्वी नेपालका हलहरूमा दर्शकको उपस्थितिको बाक्लो पाइएको छ ।

प्रिमियरका लागि बिहीबार विराटनगरको पुगेको निर्माण टिम उतै छ । यही मौकामा उनीहरूले विराटनगर, इटहरी र धरानका विभिन्न हलमा पुगेर दर्शकबाट प्रत्यक्ष प्रतिक्रिया लिएका छन् ।

धरानको फ्रेन्ड्स सिनेमाज्मा अभिनेता दयाहाङ राई, प्रवीन खतिवडा, अभिनेत्री मिरुना मगर र निर्देशक सुब्बा पुग्दा दर्शक भरिभराउ थिए । दर्शकहरूले सिनेमा उत्कृष्ट बनेको प्रतिक्रिया दिएका छन् ।

काठमाडौंसहित देशैभर पहिलो दिन दर्शकको साथ अपेक्षितरुपमा पाइएको निर्माण पक्षले बताएको छ । भोलि (शनिबार) झापाका हलहरूसँग दर्शकको प्रत्यक्ष प्रतिक्रिया लिएर निर्माण टोली काठमाडौं फर्कने योजनामा छ ।

फिल्ममा दयाहाङ राई, मिरुना मगर, प्रविण खतिवडा, मेनुका प्रधानका मुख्य भूमिकामा छन् । निर्देशक  सुब्बाकै लेखन रहेको यस फिल्मको निर्माता छायाँकार शैलेन्द्र ध्वज कार्की हुन् ।