काठमाडौं- नेपाली कांग्रेस राष्ट्रियसभा संसदीय दलका नेता रमेशजङ्ग रायमाझीले राष्ट्रियसभाको ६ वर्षे कार्यकालमा प्रभावकारी भूमिका निर्वाह गरेको बताएका छन् ।

६ वर्षे कार्यकाल पुरा हुनुअघि आइतबार काठमाडौंमा पत्रकार सम्मेलन गर्दै उनले राष्ट्रियसभामा प्रतिपक्षी र सत्तापक्ष नभनी प्रभावकारी भूमिका निर्वाह गरेको बताएका हुन् । उनले सरकारले समयमा नै विधेयकहरु नल्याउदा कानुन निर्माणमा भने सोचेजस्तो काम गर्न नसकेको धारणा राखे ।

सरकारले ल्याएका विधेकहरुलाई राष्ट्रियसभा संसदीय दलले आन्तरिक छलफल गरी आवश्यकता अनुसार संशोधन पनि दर्ता गरेको उनको भनाइ छ । उनले सङ्क्रमणकालीन न्याय, निजामती ऐनलगायत महत्वपूर्ण विधेयकमाथि छलफल गर्न नपाउँदा दुःख लागेको बताए ।

कांग्रेस राष्ट्रियसभा संसदीय दलका प्रमुख सचेतक अनिता देवकोटाले राष्ट्रियसभाको गरिमा बचाउन भूमिका खेलेको बताइन् । राष्ट्रियसभाबाट कांग्रेसका तर्फबाट चार जना सदस्य ६ वर्षे कार्यकाल पूरा गरी विदा हुँदैछन् ।