काठमाडौं- भारतीय क्रिकेट टोलीका कप्तान रोहित शर्माले खेलका क्रममा मुख छाडेर अश्लील गाली गरेको भिडियो सार्वजनिक भएको छ ।

इङ्गल्याण्डविरुद्ध जारी टेस्ट क्रिकेटका क्रममा कप्तान शर्माले आफ्ना टिमका खेलाडीलाई लक्षित गरी गाली गरेको अडियो खेलको प्रत्यक्ष प्रसारणका क्रममा सुनिएको हो ।

विकेटमा राखिएको स्टम्प माइकबाट सुनिएको अडियोमा उनले खेलाडीलाई आमा र बहिनीको गाली गर्दै अश्लील शब्दमा ‘गार्डेनमा नघुम्न’ निर्देशन दिएका छन् ।

हाल भारतको भिशाखापट्नममा रहेको डा. वाई एस राजशेखरा रेड्डी रंगशालामा भारत र इङ्गल्याण्डबीच टेस्ट चलिरहेको छ ।

दोस्रो दिनको खेल सकिँदासम्म भारतले इङ्गल्याण्डविरुद्ध १ सय ७१ रनको लिड लिएको छ । भारतले पहिलो इनिङमा ३ सय ९६ रन बनाएको थियो भने इङ्गल्याण्ड २ सय ५३ रनमा समेटिएको थियो ।

दोस्रो दिनको खेल सकिँदासम्म दोस्रो इनिङमा भारतले बिना कुनै विकेट गुमाइ २८ रन बनाएको छ ।