काठमाडौँ– प्रधानमन्त्री कप महिला टी–२० राष्ट्रिय प्रतियोगिताको उपाधिका लागि नेपाल एपीएफ क्लबले कोशी प्रदेश सामु १ सय १५ रनको लक्ष्य दिएको छ ।

कीर्तिपुरस्थित टीयू क्रिकेट मैदानमा जारी खेलमा टस जितेर पहिले ब्याटिङ गरेको एपीएफले निर्धारित २० ओभरमा ७ विकेटको क्षतिमा १ सय १४ रन बनाएको छ ।

एपीएफकी इन्दु बर्माले सर्वाधिक ५३ रनको अर्धशतकीय इनिङ खेलिन् । यस्तै, ज्योति पाण्डेले २७ तथा रोमा थापाले १४ रन बनाए ।

कोशीकी अप्सरी बेगमले सर्वाधिक तीन विकेट लिइन् । यस्तै, एलिशा खडियाले दुई तथा कप्तान रुविना क्षेत्री र निशा शाहले एक–एक विकेट लिए ।

प्रतियोगिताको विजेताले ५ लाख र उपविजेताले ३ लाख रुपैयाँ प्राप्त गर्नेछन् ।