उदयपुर- बाढीपहिरोको क्षतिबारे स्थलगत बुझेर प्रदेश राजधानी फर्किने क्रममा कोशीकी राज्यमन्त्री सिर्जना राई सवार गाडीमा आक्रमण भएको छ । लुटपाट गर्ने उद्धेश्यले एउटा समूहले राई सवार गाडीमा आक्रमण गरेको हो ।

भोजपुर र उदयपुरको सीमाक्षेत्र चुहारमा क्षतिबारे अवलोकन गरेर फर्किने क्रममा मंगलबार राति १० बजे अज्ञात समूहले उदयपुरको बेलका नगरपालिकाको सिरवानी क्षेत्रमा आक्रमण गरेको हो ।

राज्यमन्त्री राई सवार गाडीमा लुटपाट गर्ने उद्देश्यले भएको आक्रमणमा संलग्न ६ जनालाई उदयपुर प्रहरीले समातेको हो ।

राज्यमन्त्री राई सवार प्रदेश १-०४-००१ झ ००३२ नम्बरको गाडीमा आक्रमण गरी लुटपाट गर्न खोजेको अभियोगमा उदयपुर प्रहरीले ६ जनालाई पक्राउ गरेको छ ।

राज्यमन्त्री राईले चुहारको झोलुंगे पुल, जोगेपाथर घारेको झोलुंगे पुल, बाक्सीखोप झोलुंगेपुल, निर्माणाधीन मोटरेबल सडकसहितमा भएको क्षतिको अवलोकन गरेकी थिइन् । त्यसपछि विराटनगर फर्किने क्रममा गाडीमा ढुंगा हानिएको थियो ।

गाडीमा राज्यमन्त्री राईसँग भोजपुरको आमचोक गाउँपालिका उपाध्यक्ष वसन्त राईसहित ७ जना थिए । तर आफूहरूलाई सडकमा छेकेर मार्ने उद्देश्यले १५ जनाको समूहले आक्रमण गरेको उनले बताइन् ।

राईका अनुसार खुकुरी, भाला र ढुंगासहितका उनीहरूले गाडी छेक्न सडकमा मुढा राखेका थिए । गाडी सरासर अगाडि बढाएपछि ढुंगा हानिएको थियो ।