काठमाडौं– लगातार घटिरहेको शेयर बजार सोमबार भारी अंकले बढेको छ । शेयर बजार बढेसँगै कारोबार रकममा पनि बढेको छ । सोमबार नेपाल स्टक एक्सचेञ्ज (नेप्से) १२७.३२ अंकले बढेको छ ।

आज नेप्से ४.७२ प्रतिशतले बढेर २८२३.२५ विन्दुमा पुगेको छ । आज शेयर बजार बढ्दा २३९ वटा कम्पनीको शेयर मूल्य बढेको छ भने ५ वटा कम्पनीको शेयर मूल्य घटेको छ । कुनै पनि कम्पनीको शेयर मूल्य स्थिर भएको छैन ।

सोमबार प्रि ओपन सेसनमा २ अंकले बढेर सूरु भएको शेयर बाजर खुलेको केही समयमै माथि गएको थियो । तर केही माथि जान खोजे पनि १४ मिनेट पछि भने बजार तल झरेको थियो । ११ः२३ बाट माथि उक्लेको बजार चितमा ३ पटक झिनो करेक्सन आए पनि समग्रमा बजार निरन्तर उकालो लागेको थियो । बजार बन्द हुँदा नेप्से १२७ अंकले बढेर बन्द भयो ।

आज शेयरमा उछाल आएसँगै कारोबार पनि १३ अर्ब १० करोड ४६ लाख ३१ हजार रुपैयाँ पुगेको छ । आज एकै दिन ३ करोड १४ लाख ३० हजार ४८ कित्ता शेयर किनबेच भएको छ ।

नेप्से बढेसँगै सेन्सेटिभ इन्डेक्स २२.९४ अंकले, फ्लोट इन्डेक्स ९.०२ अंकले र सेन्सेटिभ फ्लोट इन्डेक्स ८.१८ अंकले बढेको छ ।

आज १३ वटा समूहमध्ये सबै समूहमा हरियाली छाएको छ । आज सबैभन्दा बढी फाइनान्स समूहको शेयर ७.९४ प्रतिशतले बढेर ३७०९.७५ विन्दुमा पुगेको छ । आज सबैभन्दा कम बढ्नेमा म्यूचुअल फण्ड समूह कम्पनीको शेयर ०.८४ प्रतिशतले बढेर २२.३४ विन्दुमा पुगेको छ ।

त्यस्तै आज वाणिज्य बैंक ४.७३ प्रतिशतले, विकास बैंक ४.९९ प्रतिशतले, हाइड्रो ५.३६ प्रतिशतले, होटल एण्ड टुरिजम ४.९२ प्रतिशतले, लगानी ५.४५ प्रतिशतले, जीवन बीमा ४.६९ प्रतिशतले, उत्पादन तथा प्रशोधन ३.३३ प्रतिशतले, लघुवित्त ३.३३ प्रतिशतले, निर्जीवन बीमा ४.८१ प्रतिशतले, अन्य समूह ४.१४ प्रतिशतले र टेड्रिङ समूह २.८५ प्रतिशतले बढेको छ ।

आज ३३५ वटा कम्पनीको शेयर १ लाख ६० हजार ५७९ पटक किनबेच भएको छ । आज १७ वटा कम्पनीको शेयर मूल्यमा सकारात्मक सर्किट लागेको छ भने थप १७ वटा कम्पनीको शेयर मूल्य ८ प्रतिशत भन्दा बढीले बढेको छ ।