काठमाडौं – उपप्रधान तथा गृहमन्त्री रवि लामिछानेले पहुँच हुनेले मात्रै कैद मिनाह पाउने क्रमको छिट्टै अन्त्य गरिने बताएका छन् ।

बिहीबार बाँकेको नौबस्तामा नवनिर्मित क्षेत्रीय कारागार भवन उद्घाटन समारोहलाई सम्बोधन गर्दै उनले खल्तीबाट नाम झिकेर कैद मिनाह गरिने प्रवृत्तिको अन्त्य गरिने बताएका हुन् ।

कैद मिनाहका लागि पहुँच खोज्नेभन्दा पनि कैदीले आचरण सुधार्नुपर्ने उनले बताएका छन् ।

असल आचरण हुनेका लागि कैद मिनाहका लागि कसैको पहुँच नचाहिने उनले उल्लेख गरे ।

कारागारहरू यातना गृहभन्दा सुधार गृह बनुन् भन्ने कुरामा सरकार सधैैँ सचेत रहेको पनि लामिछानेले बताएका छन् ।

कैदीहरूलाई सम्मानजनक काम लगाउनेबारे छलफल भइरहेको गृहमन्त्री लामिछानेले बताए ।

कैद सजाय भुक्तानी गरेर फर्किएकालाई समाजमा पुनःस्थापित गर्नुपर्ने विषयमा पनि सरकार सचेत रहेको उनले जानकारी दिएका छन्।