काठमाडौं – पाकिस्तानको सिन्ध प्रान्तमा पानीको चरम अभाव देखिएको छ । दक्षिणी सिन्ध प्रान्तका खडेरी परेको क्षेत्रमा पानीको अभाव देखिएको हो ।

सिन्ध प्रान्त भएर सिन्धु नदी बग्ने भएपनि राज्यको उदासिनता र जलस्रोतको असन्तुलित विनियोजनका कारण खडेरी परेका स्थानमा पानीको अभाव देखिएको हो । खामा प्रेसका अनुसार पानीको अभावका कारण सिन्धका स्थानीय बासिन्दा र मुख्यगरी किसान सबैभन्दा धेरै पीडित भएका छन् ।

सिन्धु नदी प्रणाली प्राधिकरणको तथ्यांक अनुसार सन् १९९९ देखि २०२३ सम्म सिन्ध प्रान्तमा ४० प्रतिशत पानीको अभाव देखिएको छ । उता पञ्जाब प्रान्तमा भने पानीको अभाव केबल १५ प्रतिशत छ ।

सिन्धु नदीको पानी विनियोजनमा समानता ल्याउन सन् १९९१ मा जल बाँडफाँट सम्झौता भएको थियो । तर, उक्त सम्झौता कुनै क्षेत्रलाई धेरै र कुनै क्षेत्रलाई थोरै पानी उपलब्ध गराउने साधनमा परिणत भएको आलोचकहरु बताउँछन् ।

हाल सरकारले पञ्जाब प्रान्तको चोलिस्तान क्षेत्रको १२ लाख एकड जमिनमा सिँचाइ गर्न ६ वटा नयाँ नहर निर्माण गर्ने योजना अघि सारेको छ । यसो भएमा सिन्ध प्रान्तका १ करोड २० लाख एकडभन्दा धेरै जमिन पानीको पहुँचबाट बञ्चित हुने सिन्ध चेम्बर अफ एग्रिकल्चरका प्रतिनिधि नबी बक्स सथियो बताउँछन् ।