काठमाडौं– काठमाडौंको कीर्तिपुर नगरपालिकामा ६७ प्रतिशत मतदान भएको छ । ०७९ को निर्वाचनमा यस नगरपालिकामा ७९.२४ प्रतिशत मतदान भएको थियो ।

यस पटकको उपनिर्वाचनमा यहाँ जम्मा ३१ हजार १ सय २२ मतदाता थिए । तर करिब २० हजार हाराहारीमा मात्र मत खसेको आयोगको प्रारम्भिक अनुमान छ ।

०७९ को निर्वाचनमा ३० हजार ३ सय २२ मतदाता थिए । त्यसमा २४ हजार ३२ ले मतदान गरेका थिए । ०७९ को भन्दा यहाँ १२ प्रतिशतले कम मतदान भएको हो ।

आयोगले अनुसार ६७ प्रतिशत मत खसेको अनुमान गरिएको जनाएको छ । आयोगका एक कर्मचारीले भने, ‘यो प्रारम्भिक विवरण हो । अहिले मतपेटिका सिल हुँदै छ पूर्ण विवरण आउन बाँकी छ ।’

कीर्तिपुरमा ११ जना स्वतन्त्र उम्मेदवार र ८ जना दलका उम्मेदवारले प्रतिस्पर्धा गरेका थिए । निर्वाचन आयोगका अनुसार स्थानीय तह निर्वाचन २०७९ मा कीर्तिपुरको प्रमुखमा नेपाली कांग्रेसका उम्मेदवार राजकुमार नकर्मी ९ हजार ४३ मतसहित विजयी भएका थिए ।

उनले निकटतम प्रतिद्वन्द्वी नेपाल कम्युनिस्ट पार्टी एमाले उम्मेदवार केशरत्‍न बज्राचार्यलाई ३,५३६ मतान्तरले पराजित गरेका थिए ।

यस्तै काठमाडौं १६ नम्बर वडामा पनि करिब ५० प्रतिशत मात्रै मत खसेको निर्वाचन आयोगको प्रारम्भिक नतिजा छ । यहाँ ०७९ को निर्वाचनमा वडा अध्यक्ष पदको मत १० हजार ६० थियो । यो पटक कम मत खसेको हो ।