काठमाडौँ– अमेरिकी राष्ट्रपतीय निर्वाचनका रिपब्लिकन उम्मेदवार डोनाल्ड ट्रम्पका राजनीतिक सल्लाहकारको फोन ह्याक भएको छ । चिनियाँ ह्याकरले ट्रम्पका राजनीतिक सल्लाहकारको फोन ह्याक गरेको वाशिंटन पोस्टले जनाएको छ ।

ती राजनीतिक सल्लाहकारको नाम भने खुलाइएको छैन । यसअघि ट्रम्प र उनका उपराष्ट्रपति प्रत्याशी जेडी भान्ससहित विभिन्न राजनीतिक व्यक्तित्वको फोनलाई निशाना बनाइएको अमेरिकी सञ्चार माध्यममा समाचार सार्वजनिक भएको थियो । उनीहरूले प्रयोग गर्ने भेरिजनको फोन प्रणालीलाई लक्षित गरी अनुचित पहुँच पुर्याउने प्रयास भएको समाचारमा जनाइएको थियो ।

अमेरिकी संघीय जाँचबुझ निकाय एफबीआई र साइबर सुरक्षा एवम् पूर्वाधार सुरक्षा निकायले चीनसँग आबद्ध भएका व्यक्तिहरूले व्यवसायिक दूरसञ्चार पूर्वाधारमा अनुचित पहुँच पुर्‍याउने प्रयास गरेको उल्लेख गरेको थिए । यद्यपि ती निकायले ट्रम्पको चुनावी अभियानलाई लक्षित गरी त्यसो गरिएको जनाएका थिएनन् ।

अन्तर्राष्ट्रिय समाचार संस्था रोयटर्सले चिनियाँ ह्याकरले डेमोक्र्याटिक उम्मेदवार एवम् उपराष्ट्रपति कमला ह्यारिससँग आबद्ध व्यक्तित्वको फोनलाई पनि निशाना बनाएको जनाएको छ ।

ती ह्याकरहरुले ट्रम्पका  राजनीतिक सल्लाहकारको टेलिफोन श्रव्य सामग्री र टेक्स्ट म्यासेजमा पनि पहुँच पुर्‍याएको वाशिंटन पोस्टले उल्लेख गरेको छ ।