काठमाडौँ– भारतले द्वन्द्वग्रस्त लेबनानमा सहायता सामग्री पठाएको छ । लेबनानका लागि भारतीय राजदूत नूर रहमान शेखले त्यहाँका स्वास्थ्यमन्त्री फिरस अबिदलाई सहायता सामग्री हस्तान्तरण गरेका हुन् ।

सामाजिक सञ्जाल एक्समा पोस्ट गर्दै लेबनानस्थित भारतीय राजदूतावासले मानवीय सहायताको पहिलो खेप हस्तान्तरण गरिएको जानकारी दिएको हो । राजदूतावासले लेबनानसँगको सम्बन्धलाई थप सुमधुर बनाउन भारत प्रतिबद्ध रहेको उल्लेख गरेको छ ।

भारतले पठाएका सहायता सामग्रीमा औषधि तथा चिकित्सकीय सामग्री रहेको भारतीय समाचार पोर्टल इकोनोमिक टाइम्सले जनाएको छ । भारतले पहिलो चरणमा लेबनानलाई ११ टनको मानवीय सहायता पठाएको छ । 

भारतले ३३ टन सहायता त्यसतर्फ पठाउने लक्ष्य लिएको छ । आफ्नो मुलुकलाई भारतले गरेको सहयोगप्रति लेबनानले कृतज्ञता प्रकट गरेको छ । भारतका लागि लेबनानका राजदूत रबिई नर्शले विश्वमा रहेका लेबनानका धेरै मित्रराष्ट्रमध्ये भारत सबैभन्दा निकट रहेको उल्लेख गरेका छन् । 

उनले आफ्नो मुलुकले आग्रह पर्नुपूर्व नै भारतले सहायता सामग्री प्रदान गरेको भन्दै खुशी व्यक्त गरेका छन् ।