काठमाडौं- कुनै समय देशकै चर्चित र सुन्दरमध्ये एक सडक थियो बीपी राजमार्ग । मानिसहरू फोटो खिच्नकै लागि पनि यो सडकबाट हिँडडुल गर्थे ।

यहाँको नागबेली सडक छिचोल्दै मधेश प्रदेश र पूर्वी नेपालका घर जाने सर्वसाधारणका लागि यो राजमार्गले लोभ्याउँथ्यो ।

तर त्यही राजमार्ग शनिबारदेखि पूरै सुनसान छ । शनिबार आएको बाढीले राजमार्गका १० भन्दा धेरै ठाउँमा कटान गरेपछि अहिले कुनै सवारी चल्न सकेका छैनन् ।

पूर्वी नेपाल जाने मुख्य राजमार्गमा बाढीले सन्नटा छाएको छ । यो राजमार्गले सुविधा लिएका स्थानीय अहिले त्रासमा बाँचिरहेका छन् ।

आफ्नो दैनिकीलाई निरन्तरता दिन मानिसहरू बाढीले सडक भत्काएर बनाएका अग्ला पहरा ज्यानको बाजी राख्दै छिचोल्दैछन् ।

काभ्रेपलाञ्चोकको रोशी गाउँपालिका-७ पुग्दासम्म २ ठाउँमा राजमार्गको ठूलो भाग नै भेटिँदैन । मानिसहरू भिरमा अडिएका ढुंगामा ज्यान घिसार्दै आवतजावत गरिरहेका छन् ।

तस्बिरहरू : नेपाल फोटो लाइब्रेरी